एकतीस

                         ददरिया

सोला -  बछर  के  उमर  हावय  तोर 

तोरे डहर लगे रहिथे मन हरहा  मोर ।

चिरई करय चोचला फेंकत हावय फोकला
फुडहर -  डहर ।
फुडहर डहर फूँगी फेंकत हावय फोकला
फुडहर - डहर ।

आनी - बानी के सिंगार करय न
घेरी - बेरी बेनी गॉथय गोंदा - फूल खोंचय
पिचकाट अब्बड करय तेला का बताववँ ?
चिरई करय चोचला फेंकत हावय फोकला
फुडहर - डहर ।
फुडहर - डहर भैया फेंकत हावय फोकला
फ़ुडहर - डहर ।

मेला - मडई म ओ दे किंदरत हे न
रेंहचुली म झूलत हे उखरा - लाडू बिसावत हे
मोला ठेंगा देखावत मोर मन मोह लिस न ।
चिरई करय चोचला फेंकत हावै फोकला
फुडहर - डहर ।
फुडहर - डहर फूँगी फेंकत हावय फोकला
फुडहर - डहर ।


             बत्तीस

              पंथी

कइसे तोर मया के बखान करवँ ग 

पंथी गावत हाववँ संगी मोर तोरेच खातिर 

मुसकियावत हाववँ संगी मोर तोरेच खातिर ।

तोरेच खातिर मैं हर जोही तिकुली चटकाए हवँ 

तोरेच नाव के हाथ म मयँ गोदना गोदाए हवँ ।

डबडबाए  हाववँ  संगी -  मोर  तोरेच  खातिर

थथमराए  हाववँ  बैरी  मोर  तोरेच -  खातिर ।  

तोरेच -खातिर महादेव म जल मैं चढावत हवँ

सीतला दायी मेर जाके जस -गीत गावत हवँ ।

निरजला -  हाववँ  जोही  मोर  तोरेच  खातिर

दिया - बारे  हाववँ  संगी  मोर  तोरेच खातिर ।

                    तैंतीस

                    पंथी

सतनाम सार ए अमृत के धार ए 

बरने नइ जाय गुरु तोर गुन ग 

गुरु तहीं ह सिखोए हस सतनाम ग ।

करम के महिमा ल तहीं ह बताए हस 

जइसे करनी तइसे भरनी तहीं समझाए हस 

गुरु तहीं ह सिखोए हस मया - मंत्र ग 

गुरु तहीं ह अँजोरे हावस मया - दिया म ।

सरी दुनियॉ ह हमरेच तो कुटुम ए 

हमरे कुटुम ए हमरे कुटुम ए ।

सुखे - सुख ल पाहवँ कइबे मन के भरम ए 

मन के भरम ए मन के भरम ए ।

गुरु तहीं ह देखाए हावस सुख - गली ग ।

पर - उपकार के तैं महिमा बताए ग महिमा बताए 

सब के सुख म अपन सुख हे तहीं समझाए ग ।

तहीं समझाए ग तहीं समझाए  

धीरे - बानी रेंगव धरे रहव सत के डहर 

गुरु तहीं ह देखाए हावस सत के डहर ।

               चौंतीस

               भरथरी

सत - नेम के गली म रेंगे बर 

तयँ ह घर ल तजे तयँ ह जोगी बने राजा भरथरी ।

तैं ह साधू मेर गय
साधू फर ल दिहिस
रानी ल फर देहे
मन - माडिस हे  मन - माडिस हे राजा - भरथरी ।

रानी ह वोही फर ल कोटवार ल जाके दे दिस हे जी
वोही फर नर्तकी ल मिलिस
अऊ नर्तकी ह वोही फर ल राजा मेर
दरबारे म दरबारे म लान के दे दिस हे जी ।

बक खा गे राजा ह सोंचत हे ए दे का हो गे जी ।
मोह - माया तजिस  ओ दे घर ल तजिस कमंडल ल धरिस
हो गे बैरागी बन गे बैरागी राजा भरथरीSSSSSSSS ।


                   पैंतिस

                 भरथरी

ए दे नोनी पिला के जनम ल धरे तोर धन भाग ए ओ

मोर नोनीSSSSSSSSSSSSSSSSS

तैं ह बेटी अस मोर तैं ह बहिनी अस मोर संगवारी अस मोर 

महतारी अस महतारी अस मोर नोनीSSSSSSSSSSSSS

लइका - ल  कोख  म ओही  धरथे  भले  ही पर धन ए

मोर नोनीSSSSSSSSSSSSSSSSSS

सब ल मया दीही भले पीरा - सइही भले  रोही - गाही
ओही डेहरी म ओही डेहरी म -  मोर नोनीSSSSSSSS

पारस - पथरा  ए  जस  ल  बढाथे  मइके  के ससुरे के
मोर नोनीSSSSSSSSSSSSSSSSSS
ओला झन हीनव ग ओला झन मारव ग
 थोरिक सुन लेवव ग गोहरावत हे गोहरावत हे मोर नोनीSSS


                     छत्तीस

              मँडवा - गीत 

हरियर - मँडवा म सातो - दायी आइन 

के सबो झन दिहिन हें असीस ओ गौरी

सबो - झन दिहिन हें - असीसे ...........।

कइना  बड - भागी  ल सब्बो सँहरावत हें

के  जीयय  वो  लाख -  बरीसे ............ ।

मउहा पान के मँडवा अऊ आमा के तोरन

ले  सुघ्घर - दिखत  हे अँगना .............।

कइना  ल  धर  के  सुआसीन - आइन 

के सुमिरत हे गौरी - गनेशे ................।

बंस -  बढाए -  बर -  बिहाव  ह  होथे

के बॉस - पूजा होही आघू ..................।

माटी के महिमा ल सब्बो झन जानव 

के चूल - माटी खने बर जावव ...........।

मँडवा  म  दसों - दिशा  के  महात्तम

के शुभ - शुभ होय सब काज.............।

मँडवा के लाज ल तुहीं मन राखिहव

के जनम सफल होइ जाय ओ गौरी 

जनम सफल होइ जाय...................।

              सैंतीस

           सोहर

लछमी धरिस हावय पॉव मोरे अँगना 

गाहवँ मैं तो सोहर आज मोरे ललना ।

मुटुर - मुटुर देखत हावय मोर नोनी 

शुभदा आए हावय कर दिस- बोहनी ।

टोर दिहिस हावय मोर सब्बो बँधना

गाहवँ मैं तो सोहर आज मोरे ललना ।

बडे  होही तहॉ वोहर चोनहा - करही

नोनी ह मोर अँगठी - धर  के  रेंगही ।

कोरा म तोला झुलाहवँ  मयँ  पलना

गाहवँ मैं तो सोहर आज मोर अँगना ।

मोर  सपना  ल  ए  नोनी  पूरा करही

पढ लिख के देश के नाव उजियारही ।

नाचत गावत हावै आज मोर अँगना

गाहवँ मैं तो सोहर आज मोरे ललना ।

             अडतीस

              सोहर 

जनम लिहिन प्रभु राम हो ललना मोर घर आ के 

गावव सबो - मंगल - चार हो ललना मोर घर आ के ।

जनम लिहिन प्रभु राम 

सॉवर - सॉवर  राम  जी  के  देह  - पान  दिखत  हे 

नयना दिखत हे अभिराम हो ललना मोर घर आ के ।

जनम लिहिन प्रभु राम 

भिनसरहा - होइस  ए दे  मोर -  भाग - जागिस  हे

अवध - बनिस  मोर  धाम हो ललना मोर घर आ के ।

जनम लिहिन प्रभु राम

जग  -  मग  ले  चँदा  मोर -  अँगना  म  आगिस हे

मन  ह  होगिस  वृन्दावन  हो ललना मोर घर आ के ।

जनम लिहिन प्रभु राम 

                   उनचालिस

                     सधौरी

गौरी के दया - मया कुल - कँवल फूलही 

के  मोरो घर आही संतान हो ललना मोरो घर आही - संतान ।

नोनी होय बाबू होय दुनों के सुवागत 

के किलकारी गूँजय अँगना हो ललना मोरो घर आही संतान ।

सब्बो सौंख पुरोहवँ मैं अपन बहू के 

घर  म आवत  हे  ललना  हो  ललना घर म आवत हे ललना ।

सुख म बूडे घर ह रस्ता देखत हे के

बॉधत  - हाववँ - झूलना  हो  ललना  बॉधत - हाववँ  झूलना ।

महावीर म रोट अऊ नरियर चढाहवँ के 

सुआसीन  बाती  बर  ना  हो  ललना  सुआसीन  बाती बर ना ।

बबा वोकर घोडा बनही मैं हर दुलारिहौं के

अइसे सुख के का कहना हो ललना अइसे  सुख के का कहना ।

                     चालीस 

          सोन - चिरैया 

सोन - चिरैया  बनाबो  भारत  ल  सोन - चिरैया बनाबो ।

परदेशी - हाट ल भगाबो भारत ल सोन - चिरैया बनाबो ।

खेती - किसानी ल पहिली बचाबो 

नइ  -  डारन  जहरीला - खातू  गोबर - खातू  ल  डारबो ।

सोन - चिरैया बनाबो भारत ल 

गौ - माता के बने सेवा ल करबो 

गो - रस के तस्मै खाबो भारत ल सोन - चिरैया बनाबो ।

सोन - चिरैया बनाबो भारत ल 

देशीच ल खाबो देशी पहिरबो 

पूँजी  ल अपन  बढाबो  भारत  ल सोन - चिरैया बनाबो ।

सोन चिरैया बनाबो भारत ल 

आसन ल करबो प्राणायाम करबो

तन मन ल स्वस्थ बनाबो भारत ल सोन चिरैया बनाबो ।

सोन - चिरैया बनाबो भारत ल 

स्विस - बैंक के पैसा ल लहुटा के लानबो 

जूना - प्रतिष्ठा  ल  पाबो  भारत ल सोन - चिरैया बनाबो ।

सोन -  चिरैया  बनाबो  भारत  ल सोन - चिरैया  बनाबो ।